Dularfulli steinninn í garðinum

Snjókorn falla á allt og alla og börnin leika og skemmta sér. Nema systkinin Ása og Baldur sem dúsa tímunum saman ein heima í nýja húsinu sínu, á meðan mamma og pabbi eru að vinna á veitingastaðnum sínum. Að minnsta kosti hafa jólasveinarnir ratað í gluggann þeirra. Þau eru nefnilega nýflutt til Reykjavíkur og eru enn að fóta sig á nýjum stað, í ókunnugu húsi með frekar skringilegum nágrönnum.

Þessi jól er ekkert eins og það á að vera, í húsinu er alltaf stórskrýtin lykt og, það sem verra er, það er leyndardómsfull hurð í eldhúsinu sem þau mega alls ekki opna. Þau langar heldur ekkert til þess, því fyrr en varir fara að berast óhugnanleg hljóð handan hennar. Hvað í ósköpunum leynist eiginlega á bak við þessa hurð?

Hiti færist í leikana þegar systkinin verða eina nóttina vör við skuggaveru í garðinum. Hún er með gul augu og virðist einkennilega forvitin um stóra og dularfulla steininn sem stendur upp úr snjónum. Hver skyldi vera þarna á ferðinni? Er þetta kannski karlinn í kjallaranum sem aldrei lætur sjá sig? Og hvað er svona merkilegt við þennan stein?

Dularfulli steinninn í garðinum eftir spennusagnahöfundinn Önnu Margréti Sigurðardóttur er stórskemmtilegt, fyndið og spennandi jólaævintýri fyrir alla fjölskylduna, svo sveipið um ykkur teppinu, fáið ykkur góðan kakóbolla og leyfið Sölku Sól að lesa ykkur inn í jólin. En hafið þó varann á, sumt í þessari sögu gæti skotið ykkur skelk í bringu!

© 2023 Storytel Original (Hljóðbók): 9789180362801
© 2023 Storytel Original (Rafbók): 9789180674997

Útgáfudagur

Hljóðbók: 24 november 2023
Rafbók: 24 november 2023