„Klukka einhverrar kirkju í Kaupmannahöfn sló tímanum nokkur högg og maðurinn, sem lá á garðbekknum, vaknaði án þess að opna augun. Honum fannst varla taka því að byrja aftur að lifa nýjan dag en vissi svo sem að ekkert gæti breytt degi í eilífa nótt nema þá dauðinn.“

Pálmi Benediktsson frá Húsavík fór í menntaskóla og ætlaði að verða tæknifræðingur eða jafnvel prestur en það átti öðruvísi að fara. Guðinn Bakkus slóst í för með honum og saman gengu þeir svo snúðugt um gleðinnar dyr að afskekktur bekkur í garði í Kaupmannahöfn varð að lokum eina athvarfið. Þetta er saga Íslendings sem sökk til botns í áfengisdrykkju og eiturlyfjaneyslu. Hann gerði þeim mein sem elskuðu hann, braut allar brýr að baki sér og lenti í ótrúlegustu þrengingum, en braust úr viðjum með góðra manna hjálp og hefur eftir það liðsinnt mörgum í svipuðum aðstæðum.

Þetta er mögnuð frásögn manns sem villtist út að ystu landamærum lífsins en rataði aftur til manna, saga niðurlægingar og dimmra örlaga en einnig birtu, vongleði og sigra.

Jónas Jónasson, hinn ástsæli útvarpsmaður færði hér í letur sögu Pálma Benediktssonar, án vorkunnsemi, en af hlýju, nærfærni og skilningi.

© 2019 Storyside (Hljóðbók): 9789179234256

Útgáfudagur

Hljóðbók: 3 september 2019