BFG

Hann kallar sig BFG, sem stendur fyrir Bergrisinn frómi góði (e. Big Friendly Giant). BFG býr í Risalandi með öðrum risum. Hann er draumaveiðari og um nætur blæs hann fallegustu draumunum sem hann finnur inn um svefnherbergisglugga barna. Kvöld eitt verður Soffía, 8 ára stúlka, vitni að þessu. BFG verður strax ljóst að hún sá hann og er honum nauðugur einn kosturinn að taka Soffíu með sér til Risalands. Í Risalandi býr BFG einn í helli ásamt löngum röðum af krukkum sem innihalda drauma. Þar búa einnig níu aðrir risar, en þeir eru ekki góðir og vænir eins og BFG. Þeir eru illvígir risar, sem fara á kreik á kvöldin og finna mannperur um allan heim til að háma í sig. Þeir halda að manneskjur séu kallaðar mannperur, sem er einhver misskilningur hjá þeim (e. human beans byggt á enska hugtakinu human beings), en BFG étur aldrei mannperur, heldur bara garúrkur, sem er einhvers konar grænmeti ekki ólíkt agúrkum, en smakkast alveg hræðilega.

Soffíu líst í fyrstu ekkert á blikuna þegar risinn tekur hana með sér en smám saman áttar hún sig á því að hann er ekki slæmur. Hún bjó á heimili fyrir munaðarlaus börn og var alveg til í að sleppa undan forstöðukonunni Kráku, sem alltaf var að hnýta í hana. Risinn talar afskaplega slæmt mál og Soffía tekur það að sér að kenna honum að tala rétt og fallegt mál. Þegar Soffía fréttir af því hvað risarnir taka sér fyrir hendur á hverju kvöldi, verður hún bæði reið og hissa. Í kjölfarið ákveða þau Soffía og BFG að stöðva þetta mannperuát risanna og upphefst spennandi atburðarrás þar sem drottningin í Bretlandi leikur stórt hlutverk. Og nú má ekki segja meir!

BFG eftir Roald Dahl er fyndin, spennandi og bráðskemmtileg bók þar sem höfundurinn leikur sér að tungumálinu en hann bjó til sérstakt tungumál kallað Gobblefunk.

Ætluð lesendum á aldrinum 6 til 12 ára.

© 2026 Kver bókaútgáfa (Hljóðbók): 9789935941961

Þýðendur: Solveig Sif Hreiðarsdóttir

Útgáfudagur

Hljóðbók: 24 oktober 2026