Lífsreynslusögur Vikunnar: 16

Lífsreynslusögur Vikunnar eru frábær liður hjá Storytel í samstarfi við Vikuna. Guðrún Óla, blaðamaður hjá Vikunni, les upp lífsreynslusögur sem sendar hafa verið inn í blaðið í gegnum tíðina, en hér er sannleikurinn lyginni líkastur! Ekkert er gefið eftir og sögurnar eru jafn ólíkar og þær eru margar. Í þessum þætti fáum við að heyra eftirfarandi frásagnir:

- Ást og eigingirni: „Systir mín hefur alla tíð átt erfitt með að ná fótfestu í samböndum við karlmenn og það var ekki fyrr en ég spurði einn af hennar fyrrverandi sem ég komst að ástæðunni.“

- Þriðji maðurinn: „Það varð mér mikið áfall þegar ég komst að framhjáhaldi mannsins míns. Við skildum í kjölfarið og næstu ár voru erfið. Þrátt fyrir allt hélt ég áfram að trúa á að ástin kæmi inn í líf mitt og fyrir ári kom hún af fullum krafti.“

- Kunni ekki að elska: „Æskuheimili mitt var mjög fallegt en minna var lagt upp úr því að okkur börnunum liði vel. Öll áhersla var lögð á fágað yfirborð en undir niðri ríkti pirringur sem var vel falinn fyrir öðrum. Þegar ég stofnaði sjálf heimili reyndist ég lítið skárri en foreldrar mínir.“

- Á síðustu stundu: „Ég bjó í útlöndum með fjölskyldu minni til 22 ára aldurs en þá ákváðu foreldrar mínir að flytja heim til Íslands. Við vorum í miklu sambandi við ættingja mína í móðurætt en ég vissi lítið um ætt pabba. Ég komst að því af eigin raun og á síðustu stundu hversu slæmt það getur verið að þekkja ekki nána ættingja sína.“

- Annað tækifæri: „Líf mitt tók miklum breytingum á einu ári skömmu fyrir aldamótin. Dóttir mín flutti til föður síns, ég skipti um starf og varð yfir mig ástfangin í kjölfarið. Við tók magnað tímabil þar sem ég upplifði alvöruást í fyrsta sinn.“