Dalu cihccet isit - Eventyret om Den syvende far i huset på samisk

Lei oktii almmái gii lei vádjoleamen olgun. Dakkáriid gohčodedje vádjoleaddjin. Áigi manai ja muhtin beaivvi son bođii ovtta stuorra, čáppa dállui. Dat lei gárdin nu stuoris ja čáppat ahte dat livččii sáhttán leat šloahtta. “ Dás de viššá vuoiŋŋastit”, dajai vádjoleaddji alccesis go lávkii verráha siskkobeallai. Dastán čuoččui boares áddjá geas ledje čurges vuovttat ja skávžžát ja luottui muoraid. “Buorre eahket, áddjá” dajai vádjoleaddji, “oaččun go mun dás ijastit?” “Mun in leat dálu isit”, dajai vuoras “mana gievkkanii ja jeara mu áhčis!” Vádjoleaddji manai gievkkanii; doppe son deaivvai ádjá gii lei vel boarrasat, ja gii čippostalai dollasajis ja bosodii áššu vai buollášii dolla fas. “Buorre eahket áddjá, oaččun go mun dán dálus ijastit?” jearai vádjoleaddji. “Mun in leat dálu isit,” vástidii vuoras “muhto mana mu áhčiin háleštit; son čohkká beavdeguoras orrunlanjas.” De vádjoleaddji manai orrunlatnjii su lusa gii čohkkái beavdeguoras. Son lei ollu boarrasat go dat guokte eará ádjá, ja son doarggistii nu ahte bánit vel skille ja logadii stuorra, assás girjjis, measta dego unna mánáš. “Buorre eahket, vuoras. Oaččun go du dálus ijastit?” jearai vádjoleaddji. “Mun in leat dálu isit, muhto háleš mu áhčiin, gii čohkká beaŋkkas”, dajai áddjá gii čohkkái beavdeguoras ja doarggistii nu ahte bánit vel skille. De manai vádjoleaddji su lusa gii beaŋkkas čohkkái ja áiggui duhpáha biipui deavdit, sus doarggistedje gieđat nu ahte illá sáhtii biippu doallat.

© 2019 Blikkboks LTD (Lydbok): 9788283961652

Oversetter: Heidi Guttorm Einarsen

Utgivelsesdato

Lydbok: 1. mai 2019