... Er hryllilega svag fyrir bókum Guðrúnar sérstaklega þó Dalalífi …….. og einu enn þriggja binda verki eftir hana sem að við köllum Jónönnubækurnar. (ónefndur bloggari) … Dásamlegar bókmenntir, verð ég að segja!! Bestar eru þó lýsingar á fólki, ýtarlegar mjög, sem kemur svo ekki frekar við sögu!! Þetta er eins og í Íslendingasögunum. (ónefndur bloggari) … Ef hægt er að segja, að eitthvað einkenni sögur Guðrúnar frá Lundi fremur öðru, þá eru það samtölin. Samræðulistin er hennar aðall. Þar er hún mikill snillingur. Oft verða samtöl svo lifandi og sérkennandi fyrir þátttakendur, að manni finnst næstum því sem maður sé viðstaddur og horfi á fólkið. (Skagfirðingabók 2008/ SB) Guðrún frá Lundi fæddist árið 1887 í Skagafirði. Hún ólst upp í mikilli fátækt, í torfbæ, fjórða barnið í hópi níu systkina sem upp komust. Hún átti lítinn kost á menntun en þurfti að vinna frá blautu barnsbeini. Hún fékk farkennslu þrjár vikur á ári í þrjá vetur, samtals níu vikur. Það var öll hennar skólaganga. Guðrún giftist tuttugu og þriggja ára og var bóndakona í þrjátíu og sjö ár en á þeim tíma eignaðist hún þrjú börn og bjó á mörgum afskekktum stöðum, ýmist innst í dölum eða á ystu nesjum á mörkum Skagafjarðar og Húnavatnssýslu. Oftast var hún ein með börn og búskap því að eiginmaðurinn var smiður og ferðaðist mikið. Guðrún var hlédræg og fremur fáskiptin kona. Hún og maður hennar fluttu til Sauðárkróks rétt fyrir seinni heimsstyrjöldina. Sauðárkrókur var engin stórborg en þegar Dalalíf byrjaði að koma út vissu margir þorpsbúar ekki að hinn frægi höfundur hefði búið þar í sjö ár. Hún byrjaði ekki að skrifa reglulega fyrr en börnin voru komin upp og var að verða sextug þegar hennar fyrsta bók kom út. Guðrún sækir efnivið sinn í sveitalífið. Bækur hennar eru þjóðlegar skemmtibókmenntir en um leið raunsæjar og henni þykir takast einstaklega vel að lýsa hversdagslífi og daglegu amstri. Bækur hennar nutu framan af lítils álits meðal bókmenntafræðinga og ritdómara en þær hafa lifað og haldið vinsældum og í rauninni má segja að Guðrún hafi skapað sérstaka bókmenntagrein sem nýtur æ meiri viðurkenningar.

© 2023 Hljóðbók.is (Hljóðbók): 9789935223005

Útgáfudagur

Hljóðbók: 6 oktober 2023