Auður djúpúðga elur ein upp son sinn á eigin jörð á Katanesi. Hún hefur haldið sig fjarri Suðureyjum frá því að leiðir hennar og Ólafs hvíta Dyflinnarkonungs skildu af ótta við að Ketill flatnefur, faðir hennar, gefi hana manni á ný. Að veturnóttum 865 kemur hún þó loks í föðurhús, til brúðkaups bróður síns og dóttur Ingólfs Arnarsonar. Þar spá dísir því að vígroða muni brátt slá á víkinga í Vesturhafi. Og víst horfir ófriðvænlega á norðanverðum Bretlandseyjum þar sem innfæddir veita norrænum mönnum æ meiri mótspyrnu og Orkneyjajarl ásælist aukin völd. Þá gerir Dyflinnarkonungur þar innrás, öllum að óvörum, og leiðir þeirra Auðar liggja saman að nýju …

Vígroði er framhald af skáldsögunni Auður sem kom út 2009, naut geysilegra vinsælda og var tilnefnd til Íslensku bókmenntaverðlaunanna. Þriðja bókin í sögu Auðar, Blóðug jörð, er væntanleg á Storytel í haust. Gagnrýnendur og lesendur hafa lofað sögu Auðar, konunnar sem á engan sinn líka í Íslandssögunni, og Vilborg Davíðsdóttir hefur undanfarin ár farið með stóra hópa lesenda í ferðir um söguslóðirnar á Suðureyjum, í Hálöndum Skotlands og Orkneyjum.

„Bókin Vígroði er feiknavel skrifuð, söguþráðurinn áhugaverður og lýsingar allar þannig að maður sér persónur og atburði ljóslifandi fyrir sér.“ - Eyja M. Brynjarsdóttir, Druslubækur og doðrantar.

,,Saman byggja skáldskapurinn og óþrjótandi fróðleikur Vilborgar um tímabilið heillandi heim sem erfitt er að kveðja. Umfram allt eru það þó persónurnar, Auður og samferðafólk hennar, sem rísa upp úr þessum magnaða hafsjó fortíðar og lifa lengi með lesandanum.“ - Maríanna Clara Lúthersdóttir, Morgunblaðið.

„Það sem einkennir bækurnar öðru fremur – og markar þeim um leið sérstöðu – er að í þeim ríkir sterkt kvennasjónarmið; það er heimur kvenna sem birtist lesendum þríleiksins ljóslifandi og sá heimur er sjaldnast fyrirferðarmikill í íslenskum miðaldaritum ... Upp teiknast breið og trúverðug mynd af heiðnu samfélagi á víkingaöld.“ - Soffía Auður Birgisdóttir, Tímarit Máls og menningar.

© 2022 Vilborg Davíðsdóttir (Hljóðbók): 9789935252029

Útgáfudagur

Hljóðbók: 14 juli 2022