Undir Svörtuloftum við Snæfellsnes á aðventu 2001 Svanborg SH 404 frá Ólafsvík kastast af ógnarafli utan í klettana þegar brimskaflarnir ríða yfir bátinn. Einn skipbrotsmanna heldur sér dauðahaldi á brúarþakinu svo klukkustundum skiptir. Hann er nær örmagna og vonar að félagar hans séu á þilfarinu fyrir neðan. Varla er stætt á bjargbrúninni – björgunarsveitarmenn geta ekkert aðhafst. Eina vonin er þyrla. TFLÍF bilar en þyrla Varnarliðsins kemst á vettvang. Sigmaður vélarinnar leggur sig í bráða lífshættu. Þegar spilvírinn laskast eru góð ráð dýr. Þarf að skilja sigmanninn og sjómanninn eftir? Hér er verið að vinna einstakt björgunarafrek. Á Hofsjökli seint í febrúar 2006 Skyndilega hrapar Toyota-jeppi með tveimur mönnum um 30 metra niður í hyldýpissprungu. Jeppinn fleygist á milli ísveggjanna og verður aðeins um metri á hæð. Inni í samankrömdu flakinu eru vinirnir Jónas Atli og Tómas Ýmir. Jónas er svo aðþrengdur að hann getur vart andað. Ekkert lífsmark er með vini hans. Nú tekur við löng og sársaukafull óvissa hjá Jónasi í kolniðamyrkri og ólýsanlegum þrengslum. Féllu jeppafélagarnir Halldór og Arnar líka niður í sprungu á sínum bílum? Gátu þeir kallað á hjálp? Hér lýsa björgunarmenn því sem í fyrstu var talið óframkvæmanlegt og aðstandendur erfiðustu stundum ævi sinnar.

© 2016 Hljóðbók.is (Hljóðbók): 9789935221186

Útgáfudagur

Hljóðbók: 1 januari 2016