Árið 1829 var framið mjög óvenjulegt rán í Flóanum þegar fjórir grímuklæddir menn réðust inn á bæinn Kamb, bundu húsráðendur, brutu og brömluðu og höfðu á brott með sér mikla peninga. Af þessu spratt mikill málarekstur og fræg glæpamál. Inn í það blandaðist með óvenjulegum hætti ein af frægustu konum 19. aldar, Þuríður Einarsdóttir formaður, sem var ekki aðeins fræg fyrir sjómennsku heldur einnig fyrir skörungsskap og vitsmuni. Brynjólfur Jónsson frá Minna-Núpi gaf 1893 úr sögu Þuríðar og Kambsránsmanna og hér segir í fyrsta kasti frá æsku og uppvexti Þuríðar.