Bræðraborg er elliheimili í litlu þorpi þar sem mannlífið blómstrar. Reyndar gengur á ýmsu og óvæntar uppákomur eiga sér stað. Hvað gerist t.d. þegar lambhrútur innritast á stofnunina? Þegar elskendur í meinum hittast eftir áratugi og hvað gengur á í hornherberginu á þriðju hæð?

Við kynnumst í leiðinni kynlegum kvistum úr þorpinu, misheppnuðu ástarævintýri á sláturhúsloftinu, skítmokstrum með viðreynsluívafi og fégráðugri spákonu sem elskar ættarnöfn. Ævi og ástir starfsfólks eru líka til umfjöllunar. Hvað gerist ef hjúkrunarforstjórinn sleppir fram af sér beislinu? Af hverju stakk fína frúin að sunnan af og fór að vinna í eldhúsinu? Tekst verkfræðingnum að tæla sjúkraliðann til útlanda? Fær húsvörðurinn aðdáun sína endurgoldna?

Alltaf er stutt í kímni og gleði en undir krauma örlögin misjafnlega sanngjörn eins og alls staðar þar sem mismunandi fólk kemur saman. Hvort er sterkara ástin eða átthagafjötrarnir og hvað er líkt með æsku og elli?