Á valdi örlaganna

Sigurður Demetz Franzson, óperusöngvari og söngkennari, sem var fæddur og uppalinn í smábæ í Suður-Tíról, dvaldi framan af ævi lengst af í stórborgum Ítalíu en flutti á miðjum aldri hingað norður til Íslands og var mikill áhrifavaldur í íslensku tónlistarlífi um árabil. Þór Jónsson, fréttamaður, hefur skráð sögu hans í bókinni Á valdi örlaganna, sem enginn tónlistarunnandi ætti að láta framhjá sér fara.

Sigurður ­eða Vincenz ­Demetz þótti ungur efni í stórsöngvara en heilladísir brugðust honum hvað eftir annað. Síðari heimsstyrjöldin var í algleymingi þegar söngferill hans hófst og flest óperuhús lokuð. Ógnir stríðsins létu engan óáreittan og starf hans við útvarp þýska hernámsliðsins í Mílanó var í senn haldreipi og hættuspil.

Eftir stríð komst hann á langþráðan samning hjá Scala-óperunni en gæfan var hverful sem fyrr og honum auðnaðist ekki að gera ráðamönnum óperunnar til hæfis lengi. Eftir að dvöl hans þar lauk söng hann um hríð í ýmsum óperuhúsum uns hendingin bar hann til Íslands árið 1955, en hér bjó hann og starfaði til æviloka.

Í æviminningum sínum rekur þessi lærimeistari ótal íslenskra söngvara örlagasögu lífs síns; bernskuár í Ölpunum í skugga styrjaldar og átaka, herþjónustu á Ítalíu, söngnám og glæstar framavonir, vonbrigði og vistaskipti. Hér á landi á hann einnig litríkan feril að baki: Hann hefur verið kokkur á bát og í síld á Raufarhöfn, hann var lengi búsettur á Akureyri, starfaði sem leiðsögumaður árum saman og síðast en ekki síst hefur hann stjórnað fjölda kóra og kennt landsmönnum söng í fjörutíu ár.

© 2019 Storyside (Hljóðbók): 9789179238285

Útgáfudagur

Hljóðbók: 29 september 2019