Krókaleiðir ástarinnar ber vissulega nafn með rentu því í bókinni liggja þær úr sveit í borg, til útlanda og aftur til baka. Sagan hefst í Reykjavík á stríðsárunum og þegar hún kom út, árið 1979, stóð á kápunni að hún fjallaði um ólgandi ástir og ógnvænleg örlög ungs fólks. Sagan segir frá Drífu Mjöll, sveitastúlku í borginni og síðar Huld, dóttur hennar og fólkinu í lífi þeirra. Sitthvað kemur upp úr kafinu, gömul leyndarmál og óvænt ættartengsl. Að lokum fæst þó á hreint hver er hvers og allir lifa sáttir upp frá því.

Vert er að taka fram að hér er saga sem lýsir viðhorfum fyrri tíma og ólíkum tíðaranda hvað viðkemur samskiptum kynjanna. Við vörum þolendur kynferðisbrota sérstaklega við efni sögunnar.

Guðbjörg Hermannsdóttir (1917–1997) ólst upp í stórum systkinahópi á Bakka við Húsavík. Hún giftist Braga Guðjónssyni klæðskerameistara (1917–1983). Þau bjuggu alla tíð á Akureyri og eignuðust fimm börn. Meðal þeirra er Snjólaug Bragadóttir, rithöfundur og þýðandi. Ljóst er að sjaldan fellur eplið langt frá eikinni, en ástarsögur Snjólaugar hafa notið gríðarlega vinsælda hjá hlustendum Storytel. Hér má því finna einstakt tækifæri til að kynnast íslenskri sveitarómantík eftir móður höfundarins sem færði okkur Ráðskona óskast í sveit, Undir merki Steingeitar, Setið á Svikráðum og fleiri dásamlegar sögur.