Kvöld eitt stígur barnshafandi kona út úr bílnum sínum sannfærð um að hún hafi keyrt á mann. Í myrkrinu er ekki sálu að sjá. Innan tíðar er kvöldkyrrðin rofin af lögreglusírenum og hefst þá leit að manninum. En hann finnst hvorki lífs né liðinn. Konan virðist hafa séð ofsjónir.

Þetta undarlega atvik reynist aðeins upphafið að margflókinni ráðgátu sem rannsóknarlögreglukonan Maria Wern verður að leysa því ekki líður á löngu þar til kona finnst látin í baðkari. Hún var með barni og allt bendir til þess að um sjálfsvíg sé að ræða. En á líkinu eru annarleg sár og Maria er sannfærð um að konan hafi ekki látist af eigin völdum. Þegar fórnarlömbunum fjölgar ásamt barnshafandi konum sem hrjáðar eru af skynvillum og undarlegum sárum sem vilja ekki gróa beinast öll bönd að dularfullri glasafrjóvgunarstofnun. Sömu stofnun og besta vinkona Mariu Wern hefur leitað til. Tekst Mariu Wern að upplýsa ráðgátuna áður en fleiri konur falla í valinn?

Glæpasagnahöfundurinn Anna Jansson dregur lesendur á ný inn í uggvænlegan söguheim þar sem sérkennileg morð og stórundarlegir atburðir skyggja á lífið í friðsælum sænskum smábæ. Megi dauðinn sofa er grípandi glæpasaga þar sem hættur leynast við hvert fótmál, leyndarmál líta dagsins ljós og heldur hún lesandanum föngnum fram á síðustu stundu.

© 2023 Storyside (Hljóðbók): 9789180629348
© 2023 Storyside (Rafbók): 9789180629355

Þýðandi: Friðrika Benónýsdóttir

Útgáfudagur

Hljóðbók: 14 augusti 2023
Rafbók: 14 augusti 2023