Ásdís Halla Bragadóttir, athafnakona og fyrrum bæjarstjóri Garðabæjar, hefur sent frá sér bók þar sem hún rekur sögu móður sinnar ásamt sinni eigin. Bókin ber nafnið Tvísaga, móðir, dóttir, feður.

Kveikjan að bókinni var símtal sem Ásdís fékk frá ókunnugum manni sem hélt því fram að þau ættu sama föður.

Aftan á bókarkápu segir:
Þótt ég grátbæði hana var ég ekki viss um að mamma segði mér sannleikann um hver raunverulegur faðir minn væri. En hvort sem henni líkaði betur eða verr var kominn tími til að feluleiknum lyki eftir áratuga þögn.

Fjölskyldusaga Ásdísar Höllu Bragadóttur er í meira lagi dramatísk. Hér segir frá ungri, einstæðri móður í Höfðaborginni í baráttu við Barnaverndarnefnd, bræðrum sem sendir eru í fóstur á Silungapoll og bíða þess aldrei bætur. Við sögu koma líka unglingsstúlka sem smyglar læknadópi inn á Litla-Hraun, menn sem hún heldur að séu feður hennar, amma og stjúpafi sem búa í torfkofa uppi á Hellisheiði og berfætt telpa sem stendur ein undir vegg í snjó og myrkri.