Með hverri öldu sem brotnar við ströndina máist dálítið af landinu burt, um leið og tíminn þokast ofurlítið úr stað. Fyrr en varir er það sem þykir sjálfsagður hluti af umhverfinu og maður veitir enga sérstaka eftirtekt í dagsins amstri orðið hluti af sögunni. Sögu einstaklings, sögu bæjarfélags, sögu þjóðar. Minningabrot sem saman mynda einhvers konar heild, að sumu leyti sanna, að sumu leyti skáldaða, og mörkin ævinlega óljós.

Myndlistamaðurinn Baski – Bjarni Skúli Ketilsson – hefur málað röð málverka sem hann lýsir sjálfur sem „minningum á striga.“ Hverri mynd fylgir stutt saga, endurminning af Akranesi, skráð samkvæmt frásögn Baska af hollenskum rithöfundi, Maria van Mierlo, sem heimsótti hann vikulega á vinnustofuna í hálft ár og fylgdist með verkunum verða til. Jafnt myndir sem sögur byggja á upplifun listamannsins, hann kallar fram í hugann liðna atburði, fólk og staði úr fortíðinni og tjáir áhrifin á sinn persónulega hátt. Útkoman er þessi einstaka bók, unnin af gleði, hlýju og þakklæti til bæjarins þar sem listamaðurinn sleit barnsskónum – Akraness.