Sveitastúlkan Lena kemur til Reykjavíkur til að læra hjúkrun. En hún kann ekki fótum sínum forráð og nú er svo komið að hún er við það að lenda á götunni. Bíll, lítill hundur og ókunnug stúlka verða þá skyndilega nýir örlagavaldar í lífi hennar. Áður en Lena veit af eru þau fjögur á leið vestur á land og síðan liggur leiðin út í sérkennilega eyju á Breiðafirði þar sem á að gera sumarlanga tilraun með nýstárlegan ferðamannastað. Nóg er að gera í Paradísinni, fólk kemur og fer og Lena blómstrar sem aldrei fyrr. En svo kemur kvíðinn því allir vita hvernig fer fyrir sumarblómum á haustin ...