Á botni hins ísi lagða Sviðnavatns, lengst norður í heimskautinu, liggur vel falinn leyndardómur sem ráðið gæti niðurlögum allra viti borinna kynþátta ef hann kæmist í rangar hendur. Þess vegna er vatnsins stöðugt gætt af voldugri systrareglu þar sem allir kynþættir eiga fulltrúa; menn, álfar, tröll, svartálfar og dvergar. Þegar nornirnar við Sviðnavatn verða fyrir síendurteknum árásum öflugs en ósýnilegs óvinar vandast þó málið. Mórún Hróbjarts álfamær og bogliðaforingi er því fengin til að skerast í leikinn. En þá fyrst hefst bardaginn líka fyrir alvöru. Í skugga Skrattakolls er fyrsta bókin um Mórúnu Hróbjarts. Atburðarásin er hröð og spennandi. Sagan er því kjörin lesning fyrir alla unnendur hreinræktaðra fantasíubókmennta, ekki síst ungmenni. Höfundurinn, Davíð Þór Jónsson, er löngu landsþekktur skemmtikraftur, útvarps- og sjónvarpsmaður, guðfræðingur, þýðandi og pistlahöfundur. Hann starfar um þessar mundir sem héraðsprestur í Austurlandsprófastsdæmi. Áður hafa komið út eftir hann tvær ljóðabækur fyrir börn og ein vísindaskáldsaga.